13.10.2016 Uppfærsla á lánshæfismati fyrirtækja Uppfærsla á lánshæfismati fyrirtækja átti sér stað miðvikudaginn 12. október og er breytingin liður í að styrkja áreiðanleika og spágetu matsins enn frekar. Helstu breytingar sem verða á lánshæfismatinu eru: Núna eru samlagsfélög (slf.) og sameignarfélög (sf.) einnig lánshæfismetin en áður voru eingöngu hlutafélög (hf.), einkahlutafélög (ehf.) og samvinnufélög (svf.) metin. Meðhöndlun flettinga hefur verið breytt, með nýju líkani er horft meira í ástæður uppflettinga og léttvægustu flettingarnar hafa ekki áhrif á lánshæfismat. Tengsl milli fyrirtækja hafa verið dýpkuð umtalsvert. Fyrirtæki eru nú tengd ef þau eru í eigu sömu einstaklinga en eign í félögum er rakin alveg niður til endanlegra eigenda. Tengingum milli fyrirtækja fjölgar því verulega. Í ársreikningum er horft lengra aftur í tímann til að verðlauna stöðugleika yfir langan tíma. Nú er einnig horft á neikvæðar athugasemdir í ársreikningi. Breyttar aukareglur: Fyrirtæki sem hafa fengið bréf um tilvonandi skráningu á vanskilaskrá geta ekki fengið betra lánshæfismat en 9. Skilaskyld félög sem eiga ekki nýlegan ársreikning fá ekki betra lánshæfismat en 6. Félög sem fara af vanskilaskrá vegna fyrningar fá ekki betra lánshæfismat en 5. Ekki er lengur þak á lánshæfismatinu vegna neikvæðs eiginfjár.