Aðrar upplýsingar

Hvaða aðrar upplýsingar, sem er þá ekki að finna á vef Creditinfo, má finna um mig?

Sú bylting sem hefur átt sér stað í upplýsingatækni síðustu ár og áratugi er þess valdandi að upplýsingar um okkur kunna að vera aðgengilegar öðrum með ýmsum hætti. Stundum með fullri vitneskju okkar og í öðrum tilvikum án þess að okkur sé kunnugt um það.

Upptalning á öðrum þeim upplýsingum sem kunna að vera til um okkur getur aldrei verið tæmandi, en hér á eftir er stiklað á nokkrum atriðum.

Bankar og sparisjóðir

Flest okkar eru með viðskiptareikning hjá banka eða sparisjóði og eðlilega er þá þar að finna ýmis konar upplýsingar um okkur vegna viðskiptasambands okkar við fjármálastofnunina, t.d. innlánsreikningar og lánveitingar félagsins til okkar.

Greiðslukortafyrirtæki

Á Íslandi er mjög algengt að nota greiðslukort, hvort sem er kredit- eða debetkort. Þar myndast um leið upplýsingar um hluta af viðskiptum okkar og jafnvel upplýsingar um hvar við vorum og hvenær.

Lífeyrissjóðir

Eðlilega halda lífeyrissjóðir utan um upplýsingar um lífeyrisréttindi okkar, inngreiðslur og útborganir.

Vinnustaðurinn

Í nær öllum tilvikum er vinnustaður hvers og eins með ýmis konar upplýsingar um starfskrafta sína, t.d. reikningsnúmer til að leggja inn laun, símanúmer og staðfestingu á menntun og þeim réttindum sem námið kann að hafa veitt viðkomandi og kann að vera skilyrði fyrir starfinu. Í sum störf er óheimilt að ráða fólk nema að tilskilinni menntun lokinni og ennfremur kann að vera nauðsynlegt að fá staðfest að viðkomandi sé ekki á sakaskrá.

Ýmis konar réttindaskrár

Líkt og áður sagði veitir sumt nám tiltekin réttindi (læknar, vélvirkjar, lögfræðingar, arkitektar, ökumenn, skipstjórar o.s.frv. verða að ljúka tilskyldu námi til að fá réttindi til þeirra starfa sem námið snéri að) og í öðrum tilvikum eru ýmis konar leyfi veitt til lengri eða skemmri tíma, samanber happdrættisleyfi. Þessar upplýsingar eru færðar til bókar hjá ýmsum aðilum, eftir því hvað á við hverju sinni.

Sakaskrá

Í sakaskrá eru færð inn úrslit sakamála. Ríkissaksóknari hefur umsjón með sakaskrá. Sakavottorð má sækja hjá öllum sýslumannsembættum landsins utan Reykjavíkur (embættið í Kópavogi sér um það fyrir Kópavog og Reykjavík) auk þess sem það er aðgengilegt hjá öllum lögreglustjóraembættum landsins utan höfuðborgarsvæðisins.

Skattyfirvöld

Hjá skattyfirvöldum eru ýmis konar upplýsingar, þó aðallega, og eðli máls samkvæmt, um skattstofna, greidd gjöld og skatta o.fl.

Símaskrá

Bæði pappírsútgáfa og rafræn útgáfa símaskrár inniheldur ýmis konar upplýsingar sem hver og einn kýs að komi fram, t.d. símanúmer, farsímanúmer, faxnúmer, netfang, vefslóð og þess háttar.

Eigin vefútgáfa

Gríðarleg bylting hefur orðið á útgáfu efnis sem einstaklingar halda sjálfir út á netinu. Þar má nefna samskiptavefi á borð við Facebook, alls kyns bloggvefi og ótal aðrar útgáfur. Á þessum vefum koma fram mismiklar upplýsingar bæði um þann sem hefur umsjón með umræddu vefsvæði og einnig um aðila sem hann á samskipti við í gegnum vefsvæði sitt.

Ýmis konar raftæki

Tölvutæknin hefur orðið nær órjúfanlegur hluti ólíklegustu raftækja í einstaklingseigu. Þar ber líklega hæst einkatölvuna og þar með tölvupósthólf viðkomandi eiganda og þeim skjölum sem hann geymir í tölvunni. En jafnframt geta farsímar, gps-tæki, stafrænar myndavélar og mörg önnur tæki (t.d. minnislyklar, augn- og fingrafaraskannar, skráarspilarar, upptökutæki fyrir sjónvörp, símsvarar o.s.frv.) innihaldið margs konar upplýsingar.

Eftirlitsmyndavélar

Upptökur úr eftirlitsmyndavélum geta gefið upplýsingar um hvar við vorum og hvenær og/eða hvar bifreið í okkar eigu var, hvenær og á hvaða hraða. Á flughöfnum víða um heim eru myndavélarnar stundum tengdar við forrit sem getur persónugreint fólk út frá líkamsbyggingu og/eða andlitsfalli.

Persónuskilríki

Ýmis konar persónuskilríki á borði ökuskírteini, vegabréf, viðskiptakort og almenn greiðslukort innihalda upplýsingar um okkur, m.a. nafn og andlitsmynd. Jafnframt eru mörg þeirra með segulrönd þar sem enn frekari upplýsingar er að finna.

Fyrirtæki sem einstaklingar eiga í viðskiptum við

Það er mismikið af upplýsingum sem einstaklinga veita þegar þeir eiga viðskipti við fyrirtæki. Minniháttar staðgreiðsluviðskipti greina ekki frá miklu um kaupandann, en viðskipti sem eiga sér stað á vefnum búa til ýmis konar upplýsingar um kaupandann, sér í lagi ef hann á oftsinnis viðskipti við sama aðila, t.d. Amazon og Ebay.
Hér er án nokkurs vafa margt óupptalið. Upplýsingar er að finna í fjölmiðlum, íþrótta- og tómstundafélögum, ýmsum stofnunum hins opinbera, hjá verkalýðsfélögum, menntastofnunum og svo framvegis.

Misstrangar reglur gilda varðandi aðgengi að upplýsingum. Stundum er það stillingaratriði hjá hverjum og einum hversu miklar upplýsingar um sig aðrir mega skoða eða söluvefur má nýta sér. Í öðrum tilvikum er aðgengi þriðja aðila háð leyfi og/eða takmarkað við ýmis konar lagalegar forsendur. Á samskiptavefum sem einstaklingar halda sjálfir úti takmarkast magn upplýsinga við það sem þeir sjálfir ákveða.

Alla jafna er öllum tryggð þau réttindi að fá upplýsingar um sig sjálfa, sem utanaðkomandi aðili kann að hafa skrásett hjá sér. Það kann þó að vera ólíkt milli ólíkra þjóðríkja, sem hafa e.t.v. mismunandi lög og reglugerðir um þessi efni, sem kann að skipta máli ef og þegar upplýsingar eru veittar til erlendra aðila.