Hvaða upplýsingar eru skráðar

Hvers kyns upplýsingar skráir og miðlar Creditinfo?

Creditinfo skrásetur bæði upplýsingar og miðlar upplýsingum úr öðrum gagnagrunnum. Til þess að hægt sé að skoða upplýsingar verður fyrst að fletta upp kennitölu einstaklings eða lögaðila og þar með sjást fyrst upplýsingar úr þjóðskrá og fyrirtækjaskrá.
Sé kennitala rangt slegin inn koma einfaldlega fram upplýsingar þess efnis að viðkomandi kennitala finnist ekki.

Ef gild kennitala er slegin inn koma fram upplýsingar um nafn viðkomandi, heimilisfang, póstnúmer og stað. Í tilviki lögaðila kemur einnig fram tegundaskammstöfun þess, til dæmis hf., ehf., ohf. sf, og svo framvegis.

Þjóðskrá er gagnagrunnur með kennitölum allra Íslendinga sem og útlendinga sem hefur verið úthlutað íslenskri kennitölu. Fyrirtækjaskrá er líkt og nafnið ber með sér skrá yfir alla lögaðila á Íslandi, þ.e. hlutafélög, stofnanir, sjálfseignarfélög, húsfélög o.s.frv.
Það er ekki fyrr en notandi er kominn með niðurstöðu úr þjóðskrá eða fyrirtækjaskrá sem hann getur kannað með upplýsingar í öðrum gagnagrunnum. Umræddir gagnagrunnar eru:

¹ Hlutafélög geta verið meðal stofnenda annarra hlutafélaga, en að öðru leyti koma hlutafélög ekki fram í hlutafélagaþátttöku.
² Í þessum skrám er flett upp eftir eign (t.d. fasteign, vinnuvél, ökutæki, landspilda) en ekki kennitölu.
³ Taka á fram í ársreikningi ef hluthafi á 10% hlut í félaginu eða meira, hvort sem um er að ræða lögaðila eða einstakling.

Hér á eftir fylgja stuttar lýsingar á þeim grunnum og upplýsingunum sem þar er að finna.

Hvers kyns upplýsingar um mig eru, eða geta verið, skráðar í VOG?

VOG er skammstöfun fyrir Vanskil og Opinberar Gerðir. Vogin er samsett skrá, sem skiptist í þrjá hluta: Skrá yfir vanskil, rekstrarsöguskrá og skrá yfir opinberar gjörðir. Hér fyrir neðan er fjallað um hvern hluta fyrir sig.

Hvers kyns upplýsingar um mig eru, eða geta verið, skráðar í skrá yfir vanskil?

Vanskilaskrá er gagnagrunnur sem Creditinfo bæði skráir í og miðlar úr upplýsingum um kröfur í vanskilum. Í starfsleyfi félagsins er það skýrt skilgreint hvers kyns vanskil má skrá þar. Er þar helst um að ræða eftirfarandi:Upplýsingar um áritaðar stefnur og dóma.
Árangurslaus fjárnám, fjárnám sem eru árangurslaus að hluta og lögmætri fjárnámsboðun ekki sinnt.
Gjaldþrot, innkallanir vegna gjaldþrotaskipta, skiptalok og greiðslustöðvun
Greiðsluáskorun vegna birtingavottorðs, greiðslusamkomulag, skuldabréf, skuldaskjal, nauðasamningur í vanskilum og réttarsátt
Það kemur sömuleiðis fram ef engar færslur eru á skrá.
Um allar skráningar gildir, að þær afskrást sjálfkrafa þegar þær ná fjögurra ára aldri, hvort sem krafan þar að baki er greidd eður ei.
Sjá einnig frekari upplýsingar um skrá yfir vanskil.

Hvers kyns upplýsingar um mig eru, eða geta verið, skráðar í rekstrarsöguskrá?

Rekstrarsöguskrá er gagnagrunnur sem Creditinfo bæði skráir í og miðlar úr upplýsingum um stjórnarsetu aðila hjá hlutafélögum, sem hafa verið úrskurðuð gjaldþrota.Um rekstrarsögu gildir þó, að til þess að heimilt sé að miðla upplýsingunum verður viðkomandi stjórnarmaður að tengjast hið minnsta tveimur félögum, og þurfa gjaldþrotaúrskurðir umrædda félaga að vera innan við 4 ára gamlar (líkt og í skrá yfir vanskil afskrást upplýsingar í rekstrarsögu sjálfkrafa við 4 ára aldur.)
Miðað er við upplýsingar úr Hlutafélagaskrá ríkisskattsstjóra. Þar eru skráðir aðilar sem hafa gegnt eftirfarandi hlutverki/hlutverkum í félaginu sem var úrskurðað gjaldþrota:

Framkvæmdastjóri
Stjórnarformaður
Stjórnarmaður
Varastjórnarmaður
Stofnandi

Stofnendur eru hins vegar einungis skráðir ef viðkomandi félag var innan við þriggja ára gamalt þegar það var tekið til gjaldþrotaskipta.
Það kemur sömuleiðis fram ef engar færslur eru á rekstrarsöguskrá. Líkt og vikið er að hér fyrir ofan, þá gildir það einnig ef einungis ein færsla hefur verið skráð.
Sjá einnig frekari upplýsingar um rekstrarsöguskrá.

Hvers kyns upplýsingar um mig eru, eða geta verið, skráðar í skrá yfir opinberar gerðir?

Í gagnagrunna Creditinfo eru einnig skráðar upplýsingar sem kunna að hafa áhrif við mat á lánshæfni einstaklinga og lögaðila, án þess að þær upplýsingar tengist vanskilum.

Hér er helst um að ræða eftirfarandi:

Upplýsingar um kaupmála milli hjóna
Svipting fjárræðis
Svipting sjálfræðis
Svipting lögræðis
Innkallanir vegna opinberra skipta
Innkallanir vegna slita á félögum
Félagaslit

Þessar upplýsingar eiga það einnig sammerkt að þær verður að kunngera í Lögbirtingablaði.

Hvers kyns upplýsingar um mig eru, eða geta verið, skráðar í GÁT?

GÁT er takmörkuð útgáfa af skrá yfir vanskil. Skammstöfunin stendur fyrir Gjaldþrot, Árangurslaus fjárnám og Tilkynningar. Umræddar tilkynningar varða innkallanir vegna gjaldþrotaskipta og auglýsingar um skiptalok. Hér gilda því nákvæmlega sömu atriði og í skrá yfir vanskil, nema umfang upplýsinganna er takmarkaðra.

Hvers kyns upplýsingar um mig eru, eða geta verið, skráðar í Dómasafni?

Dómasafn er safn Hæstaréttadóma, frá árinu 1945, auk þeirra dóma undirréttar sem áfrýjað var. Í flestum dómum koma nöfn málsaðila fram, en í afar viðkvæmum málum eru nöfn ávallt fjarlægð.
Á vef Hæstaréttar (www.haestirettur.is) er einnig að finna hæstaréttadóma, en raunar aðeins aftur til síðustu aldamóta eða þar um bil.

Hvers kyns upplýsingar um mig eru, eða geta verið, skráðar í Hlutafélagaskrá?

[Ítarefni: Hlutafélagaþátttaka] Hlutafélagaskrá er gagnagrunnur hjá Ríkisskattstjóra og líkt og nafnið gefur til kynna er þar að finna upplýsingar um hlutafélög (hf., ehf & ohf.)
Fyrir utan almennar upplýsingar um nafn, kennitölu og heimilisfang hlutafélagsins eru þar sömuleiðis skráðar upplýsingar um eftirfarandi:

Hver er framkvæmdastjóri félagsins
Hver er stjórnarformaður félagsins
Hverjir eru stjórnarmenn félagsins
Hverjir eru varastjórnarmenn félagsins
Hverjir eru stofnendur félagsins
Hverjir hafa prókúruumboð
Hverjir rita firma
Hverjir eru endurskoðendur/skoðunarmenn félagsins
Hvenær síðasta stjórn var skipuð
Dagsetning samþykkta
Upphæð hlutafjár
Tilgangur félagsins
Upplýsingar um hvort hömlur séu á meðferð hlutabréfa og hvort lausnarskylda sé á hlutum
Rekstrarform félagsins (hf., ehf. eða ohf.)
Starfsemi félagsins og ÍSAT númer

Þá getur Hlutafélagaskrá ritað athugasemdir, t.d. ef félag hefur verið úrskurðað gjaldþrota. Hafi félagið verið brottfellt úr skránni, þá eru þau félög einfaldlega merkt sem „Brottfellt skv. Fyrirtækjaskrá RSK“. Upplýsingar um önnur rekstrarform, t.d. sjálfseignarfélög, eru ekki skráðar í Hlutafélagaskrá.

Líkt og hér sést koma einstaklingar allnokkuð við sögu við skráningu hlutafélaga. Einn og sami einstaklingurinn kann jafnframt að vera skráður í nokkur hlutafélög samtímis og upplýsingar úr hlutafélagaþátttöku sýna ef svo er. Í niðurstöðu hlutafélagaþátttöku koma fram upplýsingar um hvort ákveðinn einstaklingur sé á annað borð skráður í Hlutafélagaskrá og sé það tilfellið, þá er einnig tekið fram hvaða félag eða félög er að ræða og hvaða hlutverki viðkomandi einstaklingur gegnir hjá umræddu félagi/félögum. Félög merkt sem brottfelld koma hins vegar ekki fram.

Hvers kyns upplýsingar um mig eru, eða geta verið, skráðar í Þjóðskrá og Þjóðskrá+?

Þjóðskrá greinir frá fullu nafni, kennitölu og heimilisfangi. Gagnagrunnurinn er í umsjá Þjóðskrár, sem er skrifstofa í dómsmálaráðuneytinu. Sjá nánar á vefslóðinni www.thjodskra.is/
Í Þjóðskrá+ koma fram eftirfarandi viðbótarupplýsingar:

Lögheimili*
Hjúskaparstaða*
Fjölskyldunúmer*
Kennitala maka
Nafn maka
Síðasta lögheimili á Íslandi
Kennitala umboðsmanns
Nafn umboðsmanns
Afdrif
Kyn*

Stjörnumerktar upplýsingar koma ávallt fram, en annað fer eftir því hvort viðkomandi einstaklingur er í sambúð eða hjónabandi; fluttur af landi brott; hafi skipað sér umboðsmann; eða er látinn.

Hvers kyns upplýsingar um mig eru, eða geta verið, skráðar í Fasteignaskrá?

[Ítarefni: Veðbönd fasteigna og eignaleit í fasteignum]Í Fasteignaskrá eru skráðar margs konar upplýsingar um fasteignir. Fasteignaskrá Íslands hefur umsjón með skránni. Á vef stofnunarinnar (www.fmr.is) segir orðrétt:
„Fasteignaskrá geymir allar grunnupplýsingar um lönd, lóðir og spildur auk mannvirkja sem á þeim standa. Í henni er einnig að finna upplýsingar um stærðir lóða og mannvirkja, upplýsingar um byggingarefni og lýsingu á viðkomandi mannvirki, auk fasteigna- og brunabótamats. Fasteignaskrá geymir til viðbótar upplýsingar um þinglýst réttindi, svo sem um eigendur, veðbönd og kvaðir.“
Allir eigendur fasteigna eru því skráðir í Fasteignaskrá, sem og þau veðbönd sem hvíla á fasteignum þeirra.
Upplýsingamiðlun úr Fasteignaskrá er aðallega með tvennum hætti: Annars vegar með því að fletta upp tiltekinni fasteign (skv. Heimilisfangi eða fastanúmeri fasteignar (eða landnúmeri spildu), sem er eins konar kennitala fasteignar og landspildna. Með þeim hætti fást upplýsingar um eigendur, veðbönd og kvaðir. Þetta er algengasta leitarformið.
Hins vegar er hægt að leita í Fasteignaskrá eftir kennitölu einstaklings. Miklar takmarkanir eru á eignaleit út frá kennitölu. Sá sem þess óskar þarf að vera með lögmannsréttindi og skrifa undir yfirlýsingu þess efnis að hann sé með kröfu í innheimtu þar sem heimilt er að gera aðför til fullnustu, eða lögmaðurinn er skipaður skiptastjóri í þrotabúi eða dánarbúi, enda liggi þá fyrir úrskurður héraðsdóms. Fasteignaskrá þarf að samþykkja undirritaða umsókn þar sem þessi yfirlýsing er hluti hennar.

Hvers kyns upplýsingar um mig eru, eða geta verið, skráðar varðandi greiðsluhegðun?

Upplýsingum um greiðsluhegðun er einvörðungu safnað um lögaðila, en ekki einstaklinga. Greiðsluhegðun mælir hvenær lögaðili greiðir reikninga sína, þ.e. hvort það gerist fyrir eindaga, á eindaga eða eftir eindaga – og þá hversu mörgum dögum fyrir eða eftir eindaga eftir atvikum. Greiðsluhegðun er mæld milli ársfjórðunga og er einnig litið til þess hversu margir greiðsluseðlar liggja til grundvallar hverju sinni. Þá eru upplýsingar frá síðasta ársfjórðungi bornar saman við fyrri ársfjórðunga til að sjá breytingar á greiðsluþróun, t.d. hvort félag sé að greiða reikninga fyrr eða síðar samanborið við fyrri tímabil. Þessar upplýsingar geta m.a. haft áhrif á lánveitingar, reikningsviðskipti og greiðslukjör lögaðila.

Hvers kyns upplýsingar um mig eru, eða geta verið, skráðar í ökutækjaskrá?

[Ítarefni: Veðbönd ökutækja og eignaleit í ökutækjum]Í ökutækjaskrá eru skráðar margs konar upplýsingar um fasteignir. Umferðarstofa Íslands er ábyrgðaraðili að skránni. Á vef Umferðarstofu (www.us.is) segir m.a.:
„Umferðarstofa sinnir í meginatriðum þeim verkefnum sem Skráningarstofan og Umferðarráð hafa haft á undanförnum árum. Þar er um að ræða skráningu ökutækja, tæknileg atriði sem tengjast ökutækjum, umferðarreglur og reglur um aksturs- og hvíldartíma ökumanna, forskriftir að skoðun ökutækja og eftirlit með skoðunarstofum og skráningu á evrópskum heildargerðarviðurkenningum ökutækja á EES-svæðinu fyrir Norðurlöndin. Einnig annast Umferðarstofa innleiðingu EES reglugerða um gerð, búnað og notkun ökutækja, umsjón og eftirlit með ökunámi og ökuprófum, slysaskráningar, fræðslu og miðlun upplýsinga um umferðaröryggismál og fleira“
Allir eigendur ökutækja eru skráðir í ökutækjaskrá, en upplýsingar um veðbönd eru hins vegar hjá Fasteignaskrá.
Upplýsingaleit í ökutækjaskrá svipar allnokkuð til þess sem gerist með Fasteignaskrá. Algengast er að fletta upp á ökutækinu sjálfu út frá bifreiðanúmeri þess, en til að gera eignaleit í ökutækjaskrá þarf viðkomandi að vera með lögmannsréttindi og skrifa undir yfirlýsingu þess efnis að hann sé með kröfu í innheimtu þar sem heimilt er að gera aðför til fullnustu, eða lögmaðurinn er skipaður skiptastjóri í þrotabúi eða dánarbúi, enda liggi þá sömuleiðis fyrir úrskurður héraðsdóms. Ökutækjaskrá þarf að samþykkja undirritaða umsókn þar sem þessi yfirlýsing er hluti hennar.

Hvers kyns upplýsingar um mig eru, eða geta verið, skráðar í vinnuvélaskrá?

[Ítarefni: Veðbönd vinnuvéla og eignaleit í vinnuvélaskrá]Í vinnuvélaskrá eru skráðar margs konar upplýsingar um vinnuvélar, sem eru af öllum stærðum og gerðum. Vinnueftirlit ríkisins er ábyrgðaraðili að skránni.
Um eignaleit í vinnuvélaskrá gilda sömu skilyrði og er fyrir hendi hvað varðar eignaleit í Fasteignaskrá og ökutækjaskrá.

Hvers kyns upplýsingar um mig eru, eða geta verið, skráðar í CIP-áhættumat?

CIP-áhættumat er eingöngu reiknað á lögaðila. Áhættumatið reiknar líkur á því að fyrirtæki lendi í alvarlegum vanskilum.
Áhættumat fyrirtækja er reiknað víða um heim, en e.t.v. ekki með nákvæmlega sama hætti milli landa, þar er upplýsingarnar til grundvallar eru mismunandi. Yfirleitt eru fleiri breytur sem hafa áhrif á áhættumat fyrirtækja, þar sem yfirleitt er upplýsingaskylda um rekstur þeirra, t.d. með ársreikningaskilum o.þ.h.
Upplýsingar um einstaklinga í áhættumati fyrirtækja eru mikið til í formi stjórnarsetu, sem eru hluti af upplýsingum úr Hlutafélagaskrá.

Hvers kyns upplýsingar um mig eru, eða geta verið, skráðar í Einstaklingsskýrslu?

Einstaklingsskýrsla er stutt skýrsla um einstaklinga þar sem eftirfarandi upplýsingar koma fram:

Á vanskilaskrá? (Já/Nei)
Aðrar færslur? (Já/Nei)
Flett upp síðustu 6 mánuði? (Já/Nei)
Eignatengsl við lögheimili (Já/Nei)

Fjöldi tengsla við skráð hlutafélög:

Í stjórn? (Fjöldi félaga þar sem viðkomandi er í stjórn)
Framkv.stjóri (Fjöldi félaga þar sem viðkomandi er frkv.stjóri)
Prókúruhafi (Fjöldi félaga þar sem viðkomandi er prókúruhafi)
Stofnandi (Fjöldi félaga þar sem viðkomandi er stofnandi)
Endurskoðandi (Fjöldi félaga þar sem viðkomandi er endurskoðandi)
Félög alls (Samtala þeirra félaga sem viðkomandi hefur tengsl við)

Í skýrslunni kemur því ekki fram hvaða vanskil um er að ræða, sé svarið við þeirri spurningu jákvætt. Né heldur koma fram upplýsingar um hvaða félög er að ræða, ef viðkomandi gegnir eitthverjum af ofannefndum hlutverkum hjá félagi eða nokkrum félögum.

Hvers kyns upplýsingar um mig eru, eða geta verið, skráðar í Ársreikningaskrá?

[Ítarefni: Skannaðir ársreikningar; Eign í félögum; Hluthafar] Ársreikningar fjalla eðlilega fyrst og síðast um rekstur lögaðila á liðnu ári. Engu að síður koma stundum fram upplýsingar um einstaklinga í ársreikningum, vegna ákvæða í ársreikningalögum þess efnis að skylt er að greina frá því ef hluthafi á 10% eða meira í viðkomandi félagi.
Skannaðir ársreikningar eru einfaldlega .pdf-skjöl þar sem ársreikningarnir hafa verið skannaðir nákvæmlega eins og þeir komu frá félögunum.
Upplýsingar um eign í félögum eru unnar upp úr ársreikningum og LT-skýrslum. Sem fyrr segir er greint frá því í ársreikningum ef hluthafi á 10% eða meira í félaginu. Aðrar upplýsingar um eignarhald koma frá stjórn, framkvæmdastjóra eða fjármálastjóra þess félags sem um ræðir. Í einhverjum tilvikum koma þessar upplýsingar fram í ársfjórðungsskýrslum, en það heyrir til undantekninga.

Hluthafaupplýsingar og upplýsingar um eign í félögum eru vitaskuld tvær hliðar á sama máli. Í fyrra tilvikinu er verið að kanna hverjir eiga tiltekið félag og í hinu tilvikinu er verið að athuga hvort tiltekinn aðili (einstaklingur eða félag) eigi hlut í einhverju félagi eða félögum.
Hjá lögaðilum koma einnig fram upplýsingar um dóttur- og hlutdeildarfélög.

Hvers kyns upplýsingar um mig eru, eða geta verið, skráðar í Fyrirtækjaskýrslu?

Fyrirtækjaskýrsla snýr eingöngu að upplýsingum um lögaðila. Þar koma fram upplýsingar úr síðustu ársreikningum og þess háttar.

Hvers kyns upplýsingar um mig eru, eða geta verið, skráðar í LT-skýrslu?

LT-skýrsla er ítarleg lánshæfismatsskýrsla um tiltekinn lögaðila. Hér kunna að koma fram upplýsingar um eignarhald og þar með stundum upplýsingar um einstaklinga.Í skýrslunni koma m.a. fram upplýsingar um eftirfarandi:

Áhættumat félagsins (CIP-áhættumat)
Ágrip af sögu
Tegund viðskiptavina
Fjöldi viðskiptavina
Starfsmannafjöldi
ÍSAT kóði
Stutt lýsing á starfsemi félagsins
Inn- og útflutningslönd
Kaup- og söluskilmálar
Hluthafar
Stjórn
Lykilmenn
Dóttur- og hlutdeildarfélög
Viðskiptabanki
Upplýsingar úr VOG
Upplýsingar úr síðustu ársreikningum

Upplýsingar er bæði fengnar frá opinberum aðilum (ársreikningar o.fl.) og oft frá fyrirtækjunum sjálfum. Algengast er að útbúa þurfi LT-skýrslu í tengslum við innflutning og/eða útflutning þess félags sem um ræðir hverju sinni.

Hvers kyns upplýsingar um mig eru, eða geta verið, skráðar í skönnuð skjöl?

Skönnuð skjöl taka til upplýsinga úr Hlutafélagaskrá. Hér má finna samþykktir hlutafélaga, stofnsamninga, stofnfundagerðir og ýmsar tilkynningar sem skylt er að senda til Hlutafélagaskrár.Í skönnuðum skjölum koma fram nöfn aðila sem standa að stofnun félaga og sömuleiðis þegar gerðar eru breytingar á stjórn, prókúruhafa o.s.frv.

Hvers kyns upplýsingar um mig eru, eða geta verið, skráðar í Fjölmiðlavakt?

Fjölmiðlavakt Creditinfo vaktar allt efni úr íslenskum dagblöðum og gerir handrit að öllum ljósvakafréttum auk þess að skima fréttir frá ritstýrðum netmiðlum.

Hvers kyns upplýsingar um mig eru, eða geta verið, skráðar sem hluti af markhópaleit?

Markhópaleitin er ekki eiginlegur gagnagrunnur, en stuðst er við þjóðskrá þegar markhópur er settur saman.
Standi vilji einhvers til að kynna vöru eða þjónustu með markpósti, þá velur viðkomandi ákveðnar breytur (t.d. ákveðin póstnúmer og aldursbil) og setur með þeim hætti saman póstlista þar sem eingöngu þeir sem heyra undir þessar breytur koma fram.

Hvers kyns upplýsingar um mig eru, eða geta verið, skráðar á Sjóðir.is?

Sjóðir.is er sérvefur sem mælir afkomu ýmissa sjóða, og koma upplýsingar um einstaklinga ekki þar við sögu. Auk þess að taka saman gögn um ávöxtun sjóða með samræmdum hætti og bera saman mismunandi sjóði, þá er þar að finna ítarefni um helstu hugtök sem tengjast fjármálum sjóða.
Flest þessu tengt skýrir sig best sjálft á vefslóðinni www.sjodir.is.