Um vakthólf

Hvað er vakthólf?

Vakthólf hefur þann tilgang á að vakta þær breytingar sem kunna að verða á stöðu þeirra einstaklinga og lögaðila sem eru vaktaðir í hólfinu.Til eru nokkrar mismunandi tegundir vakthólfa, eftir því hvers kyns breytingar er verið að vakta hverju sinni.
Vakthólf Creditinfo eru eftirfarandi:

• Vanskilavakt
• Afskráningarvakt
• CIP áhættuvakt
• Hlutafélagavakt
• Breytingavakt
• Fréttavakt

Sjá nánar um hvert vakthólf hér fyrir neðan.

Vanskilavakt

Fyrirtæki sem stundar láns- og reikningsviðskipti getur skráð kennitölur viðskiptavina sinna í vanskilavakt, í þeim tilgangi að koma sem fyrst auga á ef einhver lánþega og reikningshafa er skráður með færslu í vanskilaskrá.Vanskilavakt sendir umsjónarmanni vakthólfsins upplýsingar um skráninguna.
Þetta gerir fyrirtækinu kleift að grípa strax til viðeigandi ráðstafana. Þau viðbrögð geta falist í því að lækka úttektarheimildir, loka fyrir frekari úttektir, kalla eftir tryggingum og þess háttar.

Afskráningarvakt

Í afskráningarvakt skrá fyrirtæki aðila sem eru þá þegar með færslu á vanskilaskrá.Afskráningarvakt gerir umsjónarmanni hólfsins viðvart ef kennitala sem þar er vöktuð er ekki lengur með neinar færslur á vanskilaskrá.
Þær upplýsingar nýtast m.a. til þess að athuga hvort ástæða sé til að kanna hvort ógreiddar kröfur, sem félagið kann að eiga á hendur þess sem er ekki lengur skráður með vanskil, eigi að setja aftur í virka innheimtu eður ei.

CIP áhættuvakt

Fyrirtæki sem stundar láns- og reikningsviðskipti getur skráð kennitölur viðskiptavina sinna í CIP áhættuvakt til að fá upplýsingar um ef breytingar verða á áhættumati þeirra, hvort sem er til hækkunar eða lækkunar. Sem stendur er einvörðungu um að ræða breytingar á áhættumati lögaðila.
Breytingar á áhættumati kunna m.a. að leiða af sér breytingar á lánakjörum, eftir atvikum hvort matið hækkar eða lækkar.

Hlutafélagavakt

Fyrirtæki með hlutafélagavakt er að fylgjast með nýskráningum hlutafélaga í Hlutafélagaskrá, nánar tiltekið hvort tiltekin stikkorð, sem hann velur til vöktunar, komi fram í lýsingu á tilgangi nýstofnaðra félaga. Í Hlutafélagaskrá koma fram ýmsar grunnupplýsingar um hlutafélög, m.a. stjórn, prókúruhafa, stofnendur, endurskoðendur og einnig lýsing á tilgangi félagsins.
Upplýsingar um nýskráð félög nýtast bæði til þess að fylgjast með hvort og hvenær félög eru stofnuð sem myndu líklega vera meðal keppinauta á markaði, og sömuleiðis til að athuga hvort meðal nýskráðra félaga séu nokkur sem eru líklegir framtíðarviðskiptavinir.

Breytingavakt

Hér er einnig um að ræða vöktun á upplýsingum úr Hlutafélagaskrá. Hlutafélög tilkynna til Fyrirtækjaskrár ríkisskattstjóra þær breytingar sem gerðar eru félaginu varðandi stjórnarskipti, þegar nýr framkvæmdastjóri er ráðinn, breytingar á endurskoðanda, prókúruhafa o.fl.Fyrirtæki með breytingavakt fær því upplýsingar um þessar breytingar á þeim hlutafélögum sem það hefur skráð í vakthólf sitt fljótlega eftir þær breytingar hafa verið færðar til bókar í Hlutafélagaskrá.
Breytingar sem þessar kunna að skipta fyrirtæki í láns- og reikningsviðskiptum máli, meðal annars vegna þess að lánveiting kann að hafa gengið í gegn á grundvelli þess hver framkvæmdastjóri félagsins (og/eða stjórnarmenn) þess var á þeim tíma sem lánveiting var samþykkt.

Fréttavakt

Í fréttavakt er viðskiptavinum gert kleift að fylgjast með þeim fréttum sem snerta þá sjálfa, viðskiptavini sína, markaðinn í heild og samkeppnisaðila. Hér fá fyrirtæki fréttir og þáttaábendingar eftir því þeirra viðskiptahagsmunir liggja í hverju tilviki fyrir sig. Fréttavaktin nær til prentmiðla og ljósvakamiðla og ennfremur nokkurra ritstýrðra vefmiðla.

Get ég séð hvaða aðilar eru að vakta mig?

Já, það er hægt að taka saman yfirlit um hvort einhverjir vakti þína kennitölu – og fyrirtækja sem þú ert í forsvari fyrir skv. Hlutafélagaskrá – og jafnframt hvaða aðilar það eru sem vakta kennitöluna.

Ef í ljós kemur að ég er ekki í neinum láns- eða reikningsviðskiptum við aðila, sem vaktar kennitölu mína, ætti ekki að fjarlægja kennitöluna úr vakthólfinu?

Jú, alla jafna væri það eðlilegast. Þó ber að líta til þess að ef einhverjir eru fyrirsvarsmenn fyrirtækja, sem eiga í láns- eða reikningsviðskiptum við þann sem vaktar kennitöluna; sem og ef einhver hefur gengist í ábyrgð fyrir þriðja aðila af sömu ástæðu; og ef um er að ræða ófyrnda kröfu sem viðkomandi vaktaðili á ennþá á hendur viðkomandi, þá kann vöktun á kennitölu viðkomandi að vera vel innan lögvarinna hagsmuna vaktaðila.

Sé ég hverjir hafa verið með kennitölu mína í vakthólfi aftur í tímann?

Nei, sem stendur er það ekki hægt. Það sést eingöngu hvort og þá hverjir er með kennitölur á vakt í dag.

Get ég látið fjarlægja kennitölu mína úr vakthólfi, þó svo ég (eða fyrirtæki í mínu forsvari) sé með láns- eða reikningsviðskipti við fyrirtæki sem vaktar breytingar?

Vaktaðilar raða sjálfir kennitölum í þau vakthólf sem þau hafa aðgang að og hafa til þess heimild ef og þegar lögvarðir hagsmunir eru til staðar, sbr. reikningsviðskipti og lánveitingar. Vissulega er hægt að óska þess af viðkomandi félagi að fjarlægja kennitöluna úr vakthólfi, en á meðan hagsmunir þessir eru til staðar ber fyrirtækinu ekki skylda til þess.